Pulis-Quezon City patay sa leptospirosis,’di sa Dengvaxia
MANILA, Philippines — Kinumpirma ng Philippine National Police (PNP) na sakit na leptospirosis at hindi dahil sa dengue vaccine na Dengvaxia ang ikinasawi ng isang pulis mula Quezon City Police District.
Sinabi ni Chief Inspector Benaly Bayani, medical officer ng PNP Health Service, na hindi naman naturukan ng Dengvaxia ang 50-anyos na pulis at pagsusuri ay leptospirosis ang ikinasawi.
Ang leptospirosis ay isang uri ng nakamamatay na sakit sanhi ng ihi ng daga na karaniwan ng nakukuha sa paglusong sa baha.
Ayon naman kay PNP Health Service Director, Senior Superintendent Antonette Langcaoun, wala umano ang pangalan ng pulis sa masterlist ng mga naturukan ng Dengvaxia.
Na-admit sa PNP General Hospital ang pulis na nakatalaga sa Station 6 ng QCPD noong Marso 2 at namatay kinabukasan.
Dagdag pa ni Langcaoun na tanging edad 9 hanggang 45 ang tinurukan ng Dengvaxia at hindi napasama roon ang nasawing pulis na 50-anyos na.
May kabuuang 4,548 na mga pulis ang naturukan ng Dengvaxia na patuloy na minomonitor ng PNP Health Service.
Related video:
- Latest