MANILA, Philippines — Kapwa namatay ang dalawang lalaki nang ito ay pagbabarilin ng mga suspek na sakay ng isang motorsiklo kahapon ng madaling araw sa Barangay Bagong Silang, Caloocan City.
Ang mga nasawi ay kinilalang sina Marlon Valiza, alyas “Bay”, 30, tricycle driver at residente ng Phase 9 Package 5 at John Paul Dagohoy, 17, ng Phase 2 Block 50 Lot 15, ng naturang barangay.
Lumalabas sa imbestigasyon ng pulisya, dakong alas-12:15 ng madaling araw ay naghihintay ng pasahero si Valiza sa may Phase 9 Block 3 Maharlika Dulo, Bagong Silang nang lapitan ng dalawang lalaki at malapitang barilin sa ulo.
Nang masigurong patay na ang biktima ay mabilis na tumakas ang dalawang gunman sakay ng isang motorsiklo.
Una rito, dakong alas-12:00 ng hatinggabi nang pagbabarilin ng limang beses ng dalawang suspek si Dagohoy habang nakaistambay sa tapat ng bahay ng kanyang tiyahin sa nasabing barangay.
Naisugod ang biktima sa Dr. Jose N. Rodriguez Memorial Hospital ngunit nalagutan rin ng buhay dakong alas-12:23 ng madaling araw.
Inaalam pa ng pulisya kung iisa lang ang mga suspek sa pagpatay sa dalawang biktima.