MANILA, Philippines - Ilang senador ang naniniwala na gustong ipahiya si Pangulong Rodrigo Duterte ng mga nasa likod ng paghahain ng kaso sa International Criminal Court(ICC) kaya itinaon ito sa gagawing ASEAN summit sa bansa.
Sinabi ni Senator JV Ejercito, kuwestiyonable ang timing sa paghahain ng kaso at maliwanag na layunin nito na sirain ang kredibilidad ng Pangulo sa international community.
“Timing in filing of case against President Duterte in ICC is obviously meant to embarass the President in the upcoming ASEAN. Still part of a conspiracy to oust the President by destroying his credibility in the international community,” pahayag ni Ejercito.
Naniniwala naman ang ibang senador na kabilang sa mayorya sa Senado na hindi magtatagumpay ang kaso laban sa Pangulo.
Ayon kay Senate Majority Leader Vicente Sotto III, hindi nakakabahala ang kaso at mahihirapan para magtagumpay ito.
Para naman kay Senator Panfilo “Ping” Lacson, madidismaya lamang ang mga nasa likod ng pagsasampa ng kaso laban sa Pangulo sa ICC lalo kung ibinabatay lamang ito sa testimonya nina Edgar Matobato at dating SPO3 Arturo Lascañas na “polluted at perjured witnesses” at tiyak na basurahan lamang mapupunta ang kaso.