MANILA, Philippines - Namatay noon din ang isang mister na matapos na mabangga ng bus at pagtumba ay nagulungan pa ito ng truck naganap sa highway ng Brgy.Taysan,San Jose, Batangas,kamakalawa.
Nalasog ang katawan ng biktima na kinilalang si Marianito Pentinio ng Brgy. Sabang, Lipa City ng lalawigan.
Batay sa ulat,bandang alas-4:35 ng madaling araw ay kasalukuyang tumatawid ang biktima sa nabanggit na highway nang mabangga at makaladkad ng Dimple Star Bus na hindi naplakahan.
Habang nakalupasay ang biktima sa highway ay minalas itong magulungan ng parating na truck.
Sa halip namang sumuko sa pulisya ay kapwa mabilis na nagsitakas ang driver ng bus at ng truck.
Pinaghahanap ng pulisya ang driver ng bus at truck na kapwa tumakas.