MANILA, Philippines – Patuloy ang pagsalakay ng mga kawatan habang papalapit ang Kapaskuhan makaraang isa na namang supermarket ang nilooban sa Caloocan City noong Sabado ng umaga.
Bandang alas-8:30 ng umaga nang madiskubre ang nakawan sa Super 8 Warehouse, Inc. sa Rizal Avenue Extension, Brgy. 71 Monumento sa nasabing lungsod.
Sa inisyal na imbestigasyon ng pulisya, nakapasok ang mga magnanakaw sa nakabukas na bahagi na lagayan ng air-conditioning unit sa ikalawang palapag ng gusali. Winasak ng mga magnanakaw ang doorknobs ng mga kuwarto at natangay ang hindi pa mabatid na halaga kabilang ang dalawang cal. 38 revolver ng mga security guard.
Gayon pa man, nadiskubre na hindi nabuksan ang safety vault ng kumpanya habang narekober naman ang isa sa baril na nawawala sa may exit ng gusali.
Kasalukuyan namang nirerebisa ang footage ng closed-circuit television (CCTV) camera para makilala ang mga kawatan.