MANILA, Philippines – Namatay habang nilalapatan ng lunas sa ospital ang isang 49-anyos na lalaki matapos na ito ay atakehin sa puso dahil sa pag-iinom umano ng viagra nang makipagtalik sa kanyang kabit na naganap sa isang hotel sa Sta. Cruz, Maynila kamakalawa.
Ang nasawi ay kinilalang si Cecilio Javier, may-asawa, residente ng Manghinao, Bauan, Batangas, sales agent ng HBR Industrial Crane Contractor/Rental services bunsod ng cardiac arrest.
Sa salaysay ng karelasyon ng biktima na itinago sa pangalang Magdalena, 22, na sila ng biktima ay nag check-in sa Paradis Hotel, sa Sta. Cruz, Maynila bandang ala-1:00 ng hapon nitong Nobyembre 11 (Miyerkules) at bandang alas-3:30 ay nagising sila sa wake-up call ng staff ng hotel upang magtanong kung mag-e-extend sila ng oras nang biglang magsabi ang una sa kaniya na nahihilo ito.
Natumba ang biktima kaya humingi ng tulong si Magdalena sa staff ng hotel na nagsugod sa pagamutan.
Ayon kay Magdalena, na sila ng biktima ay matagal nang may relasyon at nagbunga ang kanilang bawal na pag-ibig ng isang anak na 1 taon gulang na.
Idinagdag pa ni Magdalena na 17-anyos pa lamang siya nang makarelasyon ang biktima kahit na alam naman niya na pamilyado ito at may tatlong anak sa tunay na asawa.
Idinagdag pa ni Magdalena na may maintenance na mga gamot ang biktima at alam niya na mataas ang blood sugar nito at high blood, subalit may itinatago umanong gamot sa kaniya na natuklasan niya na hindi ordinaryo.
Hindi umano niya mabasa ang gamot na ininom nito dahil sa Chinese character ang nakasulat at nalaman lang niya sa security guard ng hotel na iyon ay sex stamina o Viagra.