MANILA, Philippines – Nasawi ang dalawang katao habang 14 ang nasugatan matapos na suwagin ng isang 10- wheeler delivery truck ang 6 na sasakyan kahapon ng umaga sa kahabaan ng A. Bonifacio Avenue, Barangay Barangka, Marikina City
Ang dalawang nasawi ay kinilalang sina Edison Jan Reyes, engineering student ng Technological Institute of the Philippines (TIP) at Domingo Salvador na kapwa tumilapon palabas ng sinasakyang jeep.
Ang 14 nasugatan ay ginagamot ngayon sa Amang Rodriguez, Memorial Medical Center at dalawa rito ay kinilalang sina Fernando Gemira, 43, ng Pasig City, driver ng delivery truck (RHW-112) na naipit ang dalawang paa; Argie Reola, assistant director ng noontime program na ‘Sunday Pinasaya’ ng GMA-7 at tatlo nitong staff na sakay naman ng van.
Batay sa ulat, bago nangyari ang aksidente dakong alas-11:10 ng umaga sa A. Bonifacio Avenue ng nasabing barangay ay galing ang truck sa Aurora Boulevard at patungo sa Marikina City.
Habang pababa ito ng flyover ay nawalan umano ito ng preno at sinuwag ang tatlong pampasaherong jeep, dalawang L-300 van at isang motorsiklo bago tuluyang bumangga sa isang poste ng kuryente.
Sa lakas ng impact ng pagkakabangga, tumilapon sina Reyes at Salvador palabas ng jeepney na nagresulta sa kanilang pagkamatay.