MANILA, Philippines – Binistay ng bala at pinagtataga ang isang 37-anyos na lalaki ng dalawang anak ng kalaguyo nito naganap kamakalawa sa Zone 1, Brgy. Cawit, Zamboanga City.
Ang nasawi ay kinilalang si Ronan Punzalan, ng Zone 5, Brgy. Cawit na namatay noon din dahil sa mga tama ng bala at taga sa iba’t ibang bahagi ng katawan.
Pinaghahanap naman ng mga otoridad ang magkapatid na sina Tan Saric, 25-anyos, at ang 17-anyos nitong kapatid na itinago sa pangalang Sam ng nasabing lugar.
Batay sa ulat, pauwi na ang biktima galing sa pakikipagtagpo nito sa ina ng dalawang suspek na si Fatima Saric, 42-anyos sa mismong bahay ng pamilya at palabas na ng kanilang bakuran nang maabutan ng magkapatid.
Dito na sumiklab ang galit ng magkapatid kung saan pinagbabaril ito ni Tan, pero tumakbo sa loob ng kanilang bahay na nakorner naman ni Arthur at pinagtataga naman ito.
Idinagdag pa sa ulat upang makasigurong patay na ang biktima ay muli itong pinaputukan at pinagtataga ng magkapatid na agarang ikinasawi nito.
Narekober sa pinangyarihan ng krimen ang siyam na basyo ng bala, limang mga nadepormang bala ng hindi natukoy na uri ng armas, apat na sachet ng shabu at iba pa.
Hinala ng pulisya na ang motibo ng pagpatay ay dahil sa pakikipagrelasyon ng biktima sa ina ng magkapatid.