MANILA, Philippines – Pinasok ng tatlong hindi pa kilalang kalalakihan ang isang barangay hall at dito ay kanilang pinagbabaril ang apat na biktima sa loob na ikinasawi ng tatlo habang nasugatan ang isa naganap kahapon ng umaga sa Brgy. Datu Ismael, Dasmariñas City, Cavite.
Ang mga nasawi ay kinilalang sina Pogi Pangandag, 24; Mustafa Makaindig, 60; at Makasandig Baniaga, 57. Habang nasugatan naman ang isang Usman Masimba.
Batay sa ulat, dakong alas-11:00 ng umaga ay nasa loob ng barangay hall ang mga biktima nang pasukin ng tatlong lalaki at walang kaabog-abog na pinagbabaril ang mga ito.
Mabilis na tumakas ang mga suspek sakay ng kulay puting Nissan. Habang patuloy ang imbestigasyon ng pulisya sa motibo nang pamamaril sa mga biktima.