MANILA, Philippines - Durog ang katawan ng isang 12-anyos na batang babae nang magulungan at makaladkad ng isang rumaragasang pampasaherong bus sa Binalonan, Pangasinan kamakalawa.
Ang biktimang si Jeann Fernandez, grade-V student sa Bugayong Integrated School ay dead-on-the-spot sanhi ng grabeng mga sugat na tinamo sa kanyang katawan.
Sa ulat ng tanggapan ni Pangasinan Provincial Police Office (PPO) Director P/Sr. Supt. Reynaldo Biay, ang insidente ay naganap dakong ala-1:15 ng hapon sa kahabaan ng national highway ng Brgy. Bugayong, Binalonan.
Lumalabas sa report na biglang tumawid ang biktima habang papasok sa eskuwela, ngunit minalas itong hindi makita ng driver na si Alex Lapena, 31, dahil mataas ang minamaneho nitong Candon Bus Line (TXF 353).
Sa lakas ng pagkakabangga sa bata ay pumailalim ito sa bus na nakaladkad pa ng ilang metro na siya nitong dagliang ikinamatay.
Agad naman dinakip ng pulisya ang nasabing driver para papanagutin sa insidente.