MANILA, Philippines – Posible anya na naburyong ang isang mister nang talakan ng kanyang misis at hindi bigyan ng pera kaya’t umakyat ito sa poste ng kuryente at nagtangkang tumalon naganap kahapon sa Navotas City.
Nakatakdang sampahan ng kaukulang kaso si Cris Dansangan, 30, ng Alejandro Compound, Barangay San Jose ng dahil sa ginawa nitong pambubulahaw sa kanilang lugar.
Batay sa ulat, dakong alas-9:10 ng umaga ng akyatin ni Dansangan ang poste ng Meralco at nagtangkang tumalon.
Nagkataon na napadaan sa lugar si Mayor John Ray Tiangco at kinumbinsi si Dansangan na bumaba at huwag ituloy ang binabalak nitong pagtalon.
Makalipas ang higit sa tatlumpung minutong pakikipag-usap at sa tulong ng mga rescue team ay naibaba din si Dansangan at dinala sa ospital upang ipasuri.