MANILA, Philippines – Nagsagawa ng sorpresang inspeksyon si Manila Police District (MPD) Acting Director C/Supt. Rolando Nana sa mga miyembro ng district anti-illegal drugs at dito ay nakuha sa kanilang mga locker ang mga iligal na droga, pera at drug paraphernalias kaya’t agad na dinisarmahan ang mga ito.
Ayon kay Nana ang inspeksiyon ay bilang paglilinis niya sa sariling bakuran laban sa iligal na droga.
Sa ulat, alas-8:00 ng umaga kahapon nang isagawa ang inspeksiyon sa lahat ng mga tauhan ng DAID, District Intelligence Division (DID) at District Special Operation Unit (DSOU) dahil sa may impormasyong nakarating kay Gen. Nana hinggil sa iligal na droga na itinabi diumano ng mga operatiba, tinungo nito ang DAID office at dinistrungka ang lahat ng locker at tumambad ang mga nakatagong shabu, pera at ilang paraphernalias.
Dinisarmahan ang 10 DAID members, ang isa ay walang isyu na baril ang dalawa ay hindi naka-duty at ang dalawa naman ay hindi umano dala ang baril nang oras na iyon.
Agad na iniutos ni Nana sa Pre-Charge Evaluation Unit na imbestigahan ang mga operatiba ng DAID at isalang sa drug tests.