MANILA, Philippines - Pagbibigti ang naisip na paraan ng isang mister para takasan ang hirap ng buhay kamakalawa ng gabi sa Malabon City.
Ang biktima na idineklarang dead-on- arrival sa San Lorenzo Ruiz Hospital ay kinilalang si Richard Ramos, 34-anyos, ng MH Del Pilar St., Santolan ng lungsod.
Batay sa ulat, dakong alas-10:00 ng gabi nang madiskubre ang pagbigti ng biktima ng kanyang anak na si Charlene.
Humingi ng tulong sa mga kapitbahay si Charlene upang makalag ang kable sa pagkakatali at isinugod ang ama sa pagamutan.
Isang suicide note ang natagpuan na kung saan ay humihingi ng kapatawaran si Ramos sa pamilya at nagawa lamang niya ang pagbibigti dahil sa kakapusan ng kanilang pamilya sa pera.
Nakasulat din sa suicide note ang sama ng loob nito sa mga kaanak ng kanyang misis na umano ay hindi tumulong sa kanila.