MANILA, Philippines - Halos nalasog at nagkabali-bali ang katawan ng isang 42-anyos na electrician matapos itong mahulog mula sa ikaanim na palapag ng isang gusali naganap kahapon ng madaling-araw sa Pasay City.
Ang biktima na binawian ng buhay habang ginagamot sa San Juan De Dios Hospital ay kinilalang si Joaquin Alfonso, ng Imus, Cavite.
Sa ulat, bago ang insidente dakong ala-1:30 ng madaling-araw ay nasa ika-6 palapag ang biktima ng AMIO Builders na matatagpuan sa Conrad Manila, kanto ng Block 2, Central Business Park ng lungsod na nabanggit.
Nakasampa ang biktima sa duyan upang maglagay ng mga kawad ng kuryente nang biglang mawalan ito ng balanse dahilan upang mahulog ito at bumagsak sa ika-anim na palapag.
Isinugod ang biktima ng kanyang mga kasamahan sa pagamutan, subalit makalipas ang ilang minuto ay binawian din ito ng buhay.