MANILA, Philippines - Isang anak ng negosyanteng Filipino-Chinese ang dinukot ng hindi pa nakilalang mga armadong kalalakihan kamakalawa sa Brgy. Poblacion, Siocon, Zamboanga del Norte.
Ang biktima ay kinilalang si Michael Co, 27-anyos, anak ng may-ari ng Petron Gasoline Station sa nasabing bayan.
Ayon kay Sr. Inspector Joseph Ortega, Spokesman ng Police Regional Office (PRO) 9, dakong alas-6:35 ng gabi nang dukutin ang biktima sa bisinidad ng pag-aaring gasolinahan ng anim na armadong kalalakihan.
Walang nagawa ang biktima matapos tutukan ng baril saka kaladkarin at isinakay sa kulay maroon na KIA Sportage na walang plaka.
Sa isang follow-up operation ng mga otoridad ay narekober ang get-away vehicle na ginamit ng mga suspek sa Brgy. Latabon Siocon.