‘Million People March 2’ sa Makati may permit na

MANILA, Philippines -May permit na para sa “Million People March 2” na gaganapin sa kanto ng Ayala Avenue at Paseo de Roxas sa darating na Oktubre 4 matapos na mag­bigay ang pamahalaang lungsod ng Makati.

Ayon kay Makati City Police chief, Sr. Supt. Manuel Lukban na ini­hahanda na nila ang paglalatag ng seguri­dad para sa naturang ma­la­king pagtitipon kontra sa “pork barrel” ng Ma­lacañang at ng mga mam­babatas.

Kabilang rito ang pagtatalaga ng mga tauhan sa mga istratehikong lugar, pagsasara ng mga kalsada, at paglikha ng “traffic re-routing scheme” para naman sa mga maaapektuhang mga motorista.  Nakikipag-ugnayan umano sila ngayon sa National Capital Regional Police Office (NCRPO) upang magdagdag ng mga tauhan sa lugar lalo na at hanggang gabi ang okasyon.

Mag-uumpisa ang pagkilos dakong alas-3:00 ng hapon hanggang alas-10:00 ng gabi sa darating na Biyernes na  itiniyempo sa weekend at sa oras ng uwian ang pagtitipon upang mahikayat ang mga empleyado sa Makati Business District na ma­kilahok sa kilos-protesta at madinig rin ang ka­ni­lang mga boses.

Hinikayat rin ng mga organizer ang mga maya­yamang negosyante at pamilyang naninirahan sa Makati City na sawa na sa maruming sistema ng pamahalaan para ma­kilahok.

Nilinaw naman ng mga organizer na bawal sa pagtitipon ang pag-epal ng mga politiko na makikisakay sa ipinag­lalaban kontra sa “pork barrel”.