PHILADELPHIA — Naglaro si Joel Embiid na may Bell’s palsy at umiskor ng 50 points para banderahan ang 76ers sa 125-114 pagbawi si New York Knicks sa Game Three ng kanilang Eastern Conference first-round playoff series.
Nagsimula ang nasabing facial paralysis ni Embiid dalawang araw bago nila labanan ang Miami Heat sa play-in tournament.
Idinikit ni Embiid, nagsalpak ng 4-of-4 shooting sa three-point range sa third period, ang Philadelphia sa 1-2 sa kanilang best-of-seven duel ng New York.
Tinapos ng Knicks ang first half bitbit ang 58-55 abante bago kumamada ang seven-footer na si Embiid ng apat na triples sa third quarter para sa kanyang 18 points na nagbigay sa 76ers ng 98-85 bentahe.
Nagdagdag si Tyrese Maxey ng 25 points para sa Philadelphia at may 15 markers si Kelly Oubre.
Pinamunuan ni Jalen Brunson ang New York sa kanyang 39 points at 13 assists at may 20 markers si Josh Hart.
Sa Los Angeles, humakot si Aaron Gordon ng playoff career-high 29 points at 15 rebounds sa 112-105 paggupo ng nagdedepensang Denver Nuggets sa Lakers at ilista ang 3-0 lead sa kanilang Western Conference first-round playoff series.
Kumolekta si Nikola Jokic ng 24 points, 15 rebounds at 9 assists para sa paglapit ng Denver sa four-game sweep sa Los Angeles sa ikalawang sunod na pagkakataon.
Nag-ambag si Jamal Murray ng 22 points kasunod ang 20 markers ni Michael Porter Jr. para sa Nuggets.
Kumabig si Anthony Davis ng 33 points at 15 rebounds, habang may 26 markers si LeBron James sa panig ng Lakers.
Sa Orlando, nagposte si Paolo Banchero ng 31 points at 14 rebounds at may 24 markers si Jalen Suggs sa 121-83 pagresbak ng Magic sa Cleveland Cavaliers para sa kanilang 1-2 agwat sa first-round playoff series.