Gazz Angels tinapos ang kamalasan
MANILA, Philippines — Bumalik sa porma ang Petro Gazz matapos igupo ang talsik nang Farm Fresh, 25-22, 19-25, 25-16, 26-24, sa Premier Volleyball League Second All-Filipino Conference kahapon sa Philsports Arena sa Pasig City,
Tinapos ng Gazz Angels ang apat na sunod na kamalasan para itayo ang 5-4 kartada at buhayin ang pag-asa sa semifinal round.
Pumalo si Jonah Sabete ng 21 points mula sa 16 attacks, 3 aces at 2 kill blocks bukod sa 10 excellent digs habang may 16 markers at 12 excellent receptions si Grethcel Soltones.
“First, I’m very happy that we were able to win the game. Knowing that this is a very crucial game for us lalo na if we want to keep our semifinals hopes alive,” ani coach Timmy Sto. Tomas.
Nagdagdag si Aiza Maizo-Pontillas ng 13 points at 12 excellent receptions at may tig-10 markers sina Marian Buitre at Kecelyn Galdones.
Humampas si Trisha Tubu ng 20 points mula sa 18 attacks, 1 ace at 1 block sa panig ng Foxies (1-8).
Inagaw ng Farm Fresh ang second set, 25-19, bago inangkin ng Petro Gazz ang sumunod na dalawang sets sa likod nina Sabete at Soltones.
Samantala, pinatumba ng Chery Tiggo ang Cignal HD, 17-25, 25-19, 21-25, 25-22, 16-14, para solohin ang second place at patibayin ang hirit sa semis spot.
Nagposte si Eya Laure ng 26 points mula sa 21 attacks, 3 locks 2 aces bukod sa 11 digs para sa 7-1 baraha ng Crossovers sa ilalim ng nagdedepensang Creamline Cool Smashers (7-0).
- Latest
