F2 Logistics mapapalaban nang husto sa PLDT Home Fibr
MANILA, Philippines — Lalarga pa ang apat na koponan na target makahirit ng pambuenamanong panalo sa pagsambulat ng Day 2 ng Premier Volleyball League (PVL) All-Filipino Conference ngayong araw sa Philsports Arena sa Pasig City.
Sisimulan ng F2 Logistics ang kanilang kampanya laban sa PLDT Home Fibr sa alas-4 ng hapon na susundan ng duwelo ng Chery Tiggo kontra sa Cignal sa alas-6:30 ng gabi.
Sabik na si outside hitter Myla Pablo na humataw suot ang jersey ng Cargo Movers kasama sina Major Baron, Aby Marano, Kim Dy, Kim Fajardo, Iris Tolenado at Ivy Lacsina.
Nariyan pa si libero Dawn Macandili at ang nagbabalik na si Cha Cruz-Behag.
Ipaparada rin ng Cargo Movers si veteran mentor Regine Diego na siyang humalili kay dating head coach Ramil de Jesus.
“I can say the girls are going to be 100 percent healthy but the peak form, nobody can say that. We’re trying our best to manage whatever it is we can manage for this conference and to prevent those injuries to recur again,” ani Diego.
Sa kabilang banda ay may bagong coach din ang High Speed Hitters sa katauhan ni Rald Ricafort.
Kukuha si Ricafort ng lakas mula kina middle blockers Mika Reyes at Dell Palomata kasama si veteran playmaker Rhea Dimaculangan, Jovie Prado at Jules Samonte.
Napasakamay pa ng High Speed Hitters sina Ysa Jimenez ng University of Santo Tomas at Michelle Morente ng Philippine Army-Black Mamba.
“We consider all teams as contenders. It’s a matter of kung sino maka-sustain iyong magandang performance from start until the end iyon talaga iyong ano. For us at PLDT, we will challenge every opponent and we will spring surprises,” sabi ni High Speed Hitters assistant coach Arnold Laniog.
Panalo agad ang Creamline at Choco Mucho.
- Latest