MANILA, Philippines — Ipinakita kaagad ng Choco Mucho ang kanilang tikas matapos walisin sa tatlong sets ang Akari, 25-15, 25-20, 25-20, sa pagbubukas ng Premier Volleyball League (PVL) All-Filipino Conference kahapon sa Smart Araneta Coliseum.
Tumikada sina Madie Madayag, Kat Tolentino at Bea de Leon ng tig-11 points para sa 1-0 record ng Flying Titans laban sa Power Chargers.
Maagang ipinaramdam ng Choco Mucho ang kanilang lakas matapos hatawin ang 25-15 panalo sa Akari.
Nagpatuloy ang mainit na laro ng Flying Titans kaya nakalamang sila ng 2-0 nang itarak ang 25-20 bentahe sa second frame.
May tsansa sanang makahirit ng fourth set ang Power Chargers matapos makalamang ng dalawang puntos, 13-11, sa third set.
Pero pumalo ng 5-1 atake ang Choco Mucho kasama ang back-to-back spikes ni Madayag para maagaw ang 16-14 bentahe sa Akari.
Hindi na pinahabol ng Flying Titans ang Power Chargers at tinapos ang laban sa tatlong sets.
“Masaya talaga. Parang kinikilabutan ako kasi first time kong manalo sa PVL kaya ayun, ramdam na ramdam ko pa iyong panalo namin,” sabi ni bagong head coach Dante Alinsunurin
Kumana si Dindin Santiago-Manabat ng 17 markers mula sa 16 kills at isang service ace pero hindi sapat para itaguyod sa panalo ang Akari.