MANILA, Philippines — Nais ng De La Salle University na panain ang ikalawang sunod na panalo sa pagpapatuloy ng Shakey’s Super League Pre-season Collegiate Championships sa Rizal Memorial Coliseum sa Vito Cruz, Manila.
Susubukan ng Lady Spikers ang lakas ng defending NCAA champion na College of Saint Benilde Lady Blazers ngayong alas-3 ng hapon para mapatatag ang kapil sa liderato sa Pool D.
Lalarga rin ang salpukan ng Far Eastern University at Colegio de San Juan de Letran sa alas-12:30 ng tanghali.
Sa iba pang laro, magtutuos ang Lyceum of the Philippines University at Emilio Aguinaldo College sa alas-10 ng umaga, habang aarangkada ang salpukan ng University of the East at San Beda University sa alas-5:30 ng hapon.
Galing ang Lady Spikers sa 25-13, 19-25, 21-25, 25-22, 15-8 panalo laban sa Lady Tamaraws sa kanilang unang laro.
Nagsanib-puwersa sa naturang panalo sina Aleiah Malaluan, Jolina Dela Cruz, Leila Cruz, Thea Gagate at playmaker Marione Alba.
Wala si La Salle head coach Ramil de Jesus kaya’t si assistant mentor Benson Bocboc ang nagmamando para sa Lady Spikers sa torneo.
Nagmula ang Lady Blazers sa masaklap na 20-25, 25-24, 25-19, 20-25, 11-15 kabiguan sa Lady Tamaraws.
Sisimulan ng UAAP champions na National University ang kampanya bukas laban sa Jose Rizal University sa alas-10 ng umaga.