Maroons wagi sa Falcons sa OT
MANILA, Philippines — Naglatag ng matinding puwersa ang University of the Philippines para pigilan ang Adamson University sa pamamagitan ng 87-78 overtime win at maikonekta ang kanilang ikalawang sunod na panalo sa UAAP Season 85 men’s basketball tournament kahapon sa Philsports Arena sa Pasig City.
Naging matibay na sandalan ng UP si Season 84 Mythical Team member Zavier Lucero na kumana ng 15 points kasama ang 7 rebounds at 4 assists.
Kumolekta naman si Malick Diouf ng 13 markers, 12 boards, 4 assists, 4 blocks at 3 steals.
Nagrehistro si Terrence Fortea ng 12 points at nag-ambag ng 11 markers si Gilas Pilipinas standout Carl Tamayo para sa Fighting Maroons na napatatag ang kapit sa liderato bitbit ang 2-0 baraha.
Nangibabaw para sa Soaring Falcons si Jerom Lastimosa na bumanat ng 25 points, 6 boards at 6 assists.
Nahulog ang Adamson sa 0-2 marka.
Sa unang laro, ginulat ng University of the East ang Far Eastern University, 76-66, para wakasan ang kanilang 15-game losing slump.
Ito ang unang panalo ng Red Warriors sa liga sapul noong Oktubre 30, 2019 kung saan nila pinadapa ang National University Bulldogs, 79-77.
Tumaas ang baraha ng UE sa 1-1, habang nalaglag ang FEU sa 0-2 kartada.
“Mayroon lang kaming lapses down the stretch but still the bottom line is the game plan was followed,” sabi ni Red Warriors’ coach Jack Santiago.
Humataw si Kyle Paranada ng 25 points bukod sa 5 limang assists para banderahan ang UE.
Nasayang naman ang iniskor na 15 points ni Patrick Sleat para sa Tamaraws.
- Latest
