Coo uupong OIC ng PSC

MANILA, Philippines — Si dating national bowler Olivia “Bong” Coo ang inaasahang tatayong officer-in-charge ng Philippine Sports Commission (PSC) matapos manumpa kay Pangulong Bongbong Marcos Jr. bilang Commissioner noong Huwebes.

Ngunit kailangan pa ni Coo ng official order mula sa Malacañang bago saluhin ang nasabing posisyon mula kay PSC OIC at executive director Atty. Guillermo Iroy Jr.

Hanggang kahapon ay wala pang iniluluklok ang Presidente bilang kapalit ni William ‘Butch’ Ramirez sa PSC chairmanship maging ang tatlo pang Commissioners.

Tinutulungan ni dating Gintong Alay project director at ngayon ay Laoag City Mayor Michael Keon si Marcos sa pagpili ng tamang mga taong uupo sa sports agency.

Sa pamamahala ni Ramirez sa PSC ay nakamit ng bansa ang kauna-unahang Olympic Games gold medal mula kay national weightlifter Hidilyn Diaz.