MANILA, Philippines — Itataya ng College of Saint Benilde ang malinis na rekord nito laban sa Mapua University sa pagpapatuloy ng NCAA Season 97 women’s volleyball tournament ngayong araw sa Paco Arena sa Maynila.
Magtutuos ang Lady Blazers at Lady Cardinals sa alas-12 ng tanghali, habang masisilayan din ang salpukan ng reigning champion Arellano University at Colegio de San Juan de Letran sa alas-2:30 ng hapon.
Solong-solo ng St. Benilde ang liderato bitbit ang imakuladang 4-0 karta, habang pumapangalawa naman ang Arellano at San Sebastian College-Recoletos na may magkatulad na 3-1 marka.
Sariwa pa ang Lady Blazers impresibong 25-16, 25-16, 25-16 pagbomba sa Emilio Aguinaldo College noong Biyernes para hablutin ang kanilang ikaapat na sunod na panalo.
Naniniwala si Benilde head coach Jerry Yee na marami pang kailangang ayusin sa kanilang laro.
Ayaw ni Yee na maging kampante ang kanyang mga Lady Blazers.
“We’re being complacent. This is not to be arrogant or whatever but I’m looking at the team and see what are the things that could possibly be our downfall and that’s what I see,” ani Yee.
Marami pang pagdaraanan ang Lady Blazers kaya’t wala pang dapat ipagdiwang sa kabila ng kanilang 4-0 rekord.
Sa kabilang banda, mataas din ang moral ng Lady Cardinals na nakasakay sa three-game winning streak.
Ginulantang ng Lady Cardinals ang University of Perpetual Help System Dalta Lady Altas noong Biyernes, 20-25, 25-22, 25-23, 13-25, 15-12, na siyang nagpaangat sa kanila sa No. 5 spot.