MANILA, Philippines — Puntirya ni Michael Dasmarinas na maagaw ang dalawang titulong hawak ni Japanese fighter Naoya Inoue sa kanilang bakbakan ngayong araw sa Virgin Hotels sa Las Vegas, Nevada.
Parehong pasok sa timbang ang dalawa kung saan may bigat na 117.4 pounds si Dasmarinas habang tumimbang naman si Inoue ng 118 pounds sa official weigh-in kahapon.
Dedepensahan ni Inoue ang kanyang International Boxing Federation (IBF) at World Boxing Association (WBA) bantamweight belt.
Ngunit kung maaagaw ito ni Dasmarinas, dominado na ng Pinoy boxers ang bantamweight division dahil hawak ni Nonito Donaire ang World Boxing Council (WBC) belt habang si John Riel Casimero naman ang reigning World Boxing Organization (WBO) king.
Nakasakay si Dasmarinas sa 30-2-1 rekord tampok ang 20 knockouts samantalang malinis ang marka ni Inoue na may 20-0 baraha kasama ang 17 knockouts.
Sa kabilang banda, ga-ling si Inoue sa seventh round knockout win kay Australian Jason Moloney noong Oktubre ng nakaraang taon.
Ngunit kasado na ang game plan ni Dasmarinas.
Ibubuhos nito ang lahat dahil ito ang pinakamalaking laban sa kanyang boxing career.