76ers No. 1 sa East playoffs
Westbrook ipinoste ang pang-183 triple-double
NEW YORK — Dumiretso ang Philadelphia 76ers sa pagsikwat sa No. 1 spot sa Eastern Conference playoffs habang ipinagpatuloy ni Russell Westbrook ang pagtatala ng triple-double.
Sa Philadelphia, umiskor si Seth Curry ng 20 points at humakot si Joel Embiid ng 13 markers at 11 rebounds para pamunuan ang 76ers sa 122-97 paggupo sa talsik nang Orlando Magic.
Bukod sa top seeding ay napasakamay din ng 76ers (48-23) ang home-court advantage sa playoffs.
Pinamunuan ni Ignas Brazdeikis ang Magic (21-50) sa kanyang 21 markers.
Sa Washington, inilista ni Westbrook ang kanyang NBA record na pang-183 career triple-double sa 120-105 pagdaig ng Washington Wizards (33-38) sa sibak nang Cleveland Cavaliers (22-49).
Kumolekta si Westbrook ng 21 points, 17 assists at 12 rebounds sa kanyang league-leading na ika-37 triple-double ngayong season at ipasok ang Wizards sa play-in tournament sa East.
Napabilang din si Westbrook sa grupo nina Hall of Famers John Stockton at Isiah Thomas bilang tanging mga pla-yers na nagtala ng 15 assists sa pitong sunod na laro sa NBA history.
Sa Dallas, humakot si Luka Doncic ng triple-double na 20 points, 10 rebounds at 11 assists sa 114-110 tagumpay ng Mavericks (42-29) sa sibak nang Toronto Raptors (27-44) papasok sa playoffs sa Western Conference.
Sa Oklahoma City, dumikit ang Utah Jazz (51-20) sa No. 1 seat sa West playoffs sa 109-93 pagpapatumba sa sibak nang Thunder (21-50).
- Latest