National volleyball tryouts kasado na

MANILA, Philippines — Kasado na ang lahat sa pagdaraos ng tryouts sa Subic sa bubuuing national volleyball teams para sa 2021 Southeast Asian Games na gaganapin sa Hanoi, Vietnam.

Idaraos ngayong araw hanggang bukas ang tryout sa indoor volleyball sa Subic gym habang sa Biyernes naman ang para sa beach volleyball sa Subic  sand courts.

Kumpirmado na ang pagdating ng ilang key players sa pangunguna ni dating national team captain Aby Maraño at Asean Grand Prix Best Middle Blocker Majoy Baron.

Nanguna sina Maraño at Baron sa mga sumailalim sa swab test na isa sa requirements ng Inter-Agency Task Force (IATF) para matuloy ang tryout.

Bago magsimula ang tryout, ilang players na kasama sa mga inimbitahan ang nagpahayag na hindi dadalo sa tryout dahil sa health security.

Hindi rin makadadalo si Filipino-American Kalei Mau na nakatakdang maglaro bilang import sa Changos de Naranjito sa Liga de Voleibol Superior Femenino sa Puerto Rico.

Tiniyak naman ni Mau na pagkatapos ng liga sa Puerto Rico ay agad itong tutulak sa Maynila para makasama ang F2 Logistics sa kampanya sa Premier Volleyball League.