Middleton bida sa panalo ng Bucks

ORLANDO, Fla. — Umiskor si Khris Middleton ng 21 points at may 16 markers si Bobby Portis kasama ang apat na three-pointers para banderahan ang Milwaukee Bucks sa 124-87 pagdomina sa Magic.

Tinapos ng Bucks (33-20) ang kanilang three-game losing skid sa kabila ng hindi paglalaro ng kanilang star player na si Giannis Antetokounmpo na may namamagang kaliwang tuhod.

Nagtala rin si Middleton ng 8 rebounds at 5 assists para sa Milwaukee na nagsalpak ng kabuuang 19 triples para sa kanilang ikaanim na sunod na paggupo sa Orlando (17-36).

Pinamunuan ni Mo Bamba ang Magic, nalasap ang pang-limang sunod na kamalasan, sa kanyang career-best na 21 points.

Sa Denver, gumamit ang Boston Celtics (28-26) ng 31-3 atake sa second half para kunin ang 105-87 panalo at pigilin ang eight-game winning streak ng Nuggets (34-19).

Pinangunahan ni Jayson Tatum ang Celtics sa kanyang 28 points dalawang araw matapos kumamada ng career-best na 53-points laban sa Minnesota Timberwolves.

Sa Los Angeles, naghulog si Paul George ng 32 points para akayin ang Clippers (37-18) sa 131-124 paggupo sa Detroit Pistons (16-38).