76ers bandera pa rin sa East

PHILADELPHIA — Humataw si reserve Shake Milton ng 26 points habang may 19 markers si Furkan Korkmaz para tulungan ang 76ers sa 130-114 paggupo sa Indiana Pacers.

Humakot si star center Joel Embiid ng 24 points at 13 rebounds at nagdagdag si Ben Simmons ng 18 points at 6 boards para sa Philadelphia (23-12) na nangunguna sa Eastern Conference.

Pinamunuan ni forward Domantas Sabonis ang Indiana (15-18) sa kanyang 15 points, 9 boards at 7 assists.

Sa New Orleans, naglista si Zion Williamson ng 26 points, 10 rebounds at 5 assists para banderahan ang Pelicans (15-19) sa 129-124 pagtakas sa NBA-leading Utah Jazz (27-8).

Nagsalpak si Bojan Bogdanovic ng pitong three-point shots para tumapos na may game-high 31 points sa panig ng Jazz.

Sa San Antonio, tumapos si James Harden na may triple-double sa kanyang 30 points, 14 boards at 15 assists para akayin ang Brooklyn Nets (23-13) sa 124-113 overtime win sa Spurs (17-13).

Sa Chicago, kumolekta si Nikola Jokic ng 39 points at 14 rebounds para sa 118-112 paghuli ng Denver Nuggets (19-15) sa Bulls (15-18).

Sa Orlando, kumayod si Luka Doncic ng 33 points, 10 rebounds at 9 assists habang may 17 markers si Kristaps Porzingis para sa 130-124 paggupo ng Dallas Mavericks (17-16) sa Magic (13-22).

Sa Houston, nagpasabog si Collin Sexton ng 39 points para ihatid ang Cleveland Cavaliers (14-21) sa 101-90 pagpapabagsak sa Rockets (11-22).