Abanse negrense sa semis

MANILA, Philippines — Inilampaso ng Abanse Negrense-1 ang Toby’s Sports sa bendisyon ng 21-12, 21-11 demolisyon upang masungkit ang unang tiket sa semifinals ng 2021 Gatorade-Beach Volleyball Challenge Cup kahapon sa Subic Bay Metropolitan Authority (SBMA) sand courts.

Naging sandalan nina Abanse Negrense-1 bets Alexa Polidario at Erjan Magdato ang malalim nitong karanasan para mabilis na dispatsahin ang tambalan nina Jonah San Pedro at Javen Sabas ng Toby’s Sports.

“Everyday ang training namin sobrang pinaghandaan namin ito.  Minsan pressured din kami kapag alam namin na ‘yung kalaban medyo malakas din. Pero ginagawa lang namin ‘yung pinag-aralan namin,” ani Polidario

Nakuha ng Abanse Negrense-1 ang top seeding sa Pool A  matapos walisin ang lahat ng tatlong asignatura nito sa group stage.

 Pumangalawa sa Pool A ang Sta. Lucia-2 na may 2-1 marka kasunod ang F2 Logistics (1-2) at Kennedy Solar Energy-Petro Gazz (0-3).

Sa Pool B, nangibabaw ang Abanse Negrense-2 na nagtala rin ng perpektong 3-0 marka habang pumangalawa ang Sta. Lucia-1 (2-1) kabuntot ang United Auctioneers (1-2) at Toby’s Sports (0-3).

Lalaruin ngayong araw ang semifinals at finals.