Training ng mga Olympic hopefuls madaling maaaprubahan-- Fernandez

MANILA, Philippines — Dahil kasama ang Philippine Sports Commission (PSC) sa Technical Working Group (TWG) na naglalatag ng guidelines ay hindi mahihirapan ang mga Olympic Games hopefuls na makakuha ng ‘go signal’ para sa isang ‘bubble’ training.

Ito ang opinyon ni PSC Commissioner Ramon Fernandez sa patuloy na pagkakatengga ng mga atleta dahil sa coronavirus disease (COVID-19) pandemic.

“I don’t think there wlll be any problem with that because, we the PSC, the GAB (Games and Amusements Board), the DOH (Department of Health) have a joint group that will put in place the minimum health protocols needed to do a bubble (training),” ani Fernandez.

Hindi pa rin pinapayagan ng Inter-Agency Task Force (IATF) ang pagbabalik-ensayo ng mga national athletes dahil sa COVID-19 pandemic.

Ang TWG ang siyang naglalatag ng guidelines na gagamitin para sa pagbabalik ng mga atleta sa training at irerekomenda sa IATF na siyang mag-aapruba nito.

Plano ng PSC na ipasok ang mga atletang naghahangad ng tiket sa 2021 Olympic Games sa Tokyo, Japan sa isang ‘bubble’ training sa Inspire Sports Academy sa Calamba, Laguna.

“They know the importance of this preparations for our athletes. Walang problema masyado iyan as long as ma-aassure natin na iyong health protocols are properly followed,” wika ni Fernandez.

Idinagdag pa ng PSC Commissioner na magiging mahigpit sila sa pagpapatupad ng health at safety protocols sa loob ng nasabing ‘bubble’. “Once you put in the athletes in a bubble wala nang puwedeng pumunta doon, wala nang puwedeng pumasok,  walang puwedeng lumabas. Sila lang talaga ang nandoon para maiwasan natin ‘yung hawahan,” ani Fernandez.