Smart Araneta Coliseum gagamitin ng PBA

MANILA, Philippines — Ang Smart Araneta Coliseum ang tinitingnan ng Philippine Basketball Association (PBA) na gagamiting facility sa pagbabalik sa training at conditio-ning ng mga players.

Hindi na ikinunsidera ng PBA ang Mall of Asia Arena bilang training facility dahil ang Pasay City venue ay ginagamit bilang quarantine center para sa mga nagpositibo sa coronavirus disease (COVID-19).

Ayon kay Marcial, may ipinatutupad na health at safety protocols ang Smart Araneta Coliseum na makabubuti sa mga PBA coaches, players at team staff.

“May sarili silang protocols, may protocols din ang GAB (Games and Amusements Board), may protocols din tayo. Kung may kulang, dadagdagan,” ani Marcial. “Mas maraming protocols, mas mabuti para sa atin.”

Pinayagan ng Inter-Agency Task Force (IATF) ang PBA at Philippine Football League (PFL) na magbalik sa training at conditioning sa mga lugar na nasa ilalim ng General Community Quarantine (GCQ).

Nilinaw ni Marcial na gagamitin ng PBA ang ‘closed circuit’ concept kung saan bahay-gym-practice lang ang mga players.

Bahagi rin ng kanilang protocols ang swab testing ng mga players bawat 10 araw.

“May testing tayo every 10 days. Hindi kaya ng everyday ‘yun dahil may incubation period. Kunwari, mag-test ka ngayon tapos nag-negative. After five days saka ka tatamaan ng positive,” wika ni Marcial. “Sa akin, hindi advisable ‘yung araw-araw kasi may incubation period.”