Kakaibang Kai Sotto nasilayan

MANILA, Philippines — Hindi sinayang ng Filipino prodigy Kai Sotto ang pagbabalik-ensayo niya sa U.S nang agad magpasiklab sa isang scrimmage ng Pro-Am summer league.

Armado ng pinalakas at pinabilis na katawan bunsod ng walang humpay na individual workouts sa gitna ng pandemya, mas mabangis na 7-foot-2 Sotto ang nagpagkitang-gilas at dumakdak sa mga kalaban.

Magandang footwork din ang ipinakita ni Sotto bukod pa sa mas matatas na vertical leap.

Nauna na siyang nag-post sa social media ng kanyang vertical leap na umabot hanggang pambihirang 11 feet at 11.5 inches. Maikukumpara ito sa 12-inch maximum vertical leap ng 7-foot-3 Dallas Mavericks star na si Kristaps Porzingis.

Nauna na ring sinabi ng coach ni Sotto sa The Skills Factory na si Rob Johnson na malaki ang ipinagbago ni Sotto sa ‘strength and explosiveness’ sa isang taong pag-eensayo upang maging handa  sa misyong maka-tapak sa NBA.

Si Sotto ang unang international signee ng G League.