ONE: King of the Jungle sa Singapore ginawang closed-door dahil sa COVID-19

MANILA, Philippines — Dahil sa pinangangambahang novel coronavirus, nagdesisyon ang pamunuan ng ONE Championship na gawing closed-door event ang ONE: King of the Jungle sa Pebrero 28 sa Singapore Indoor Stadium.

Inilabas ng Ministry of Health ng Singapore na umabot na sa 75 ang kumpirmadong tinamaan ng coronavirus kaya’t nagpasya si ONE Chairman/CEO Chatri Sityodtong na huwag itong buksan sa publiko.

Nilinaw ni Sityodtong na mabibigyan pa rin ng pagkakataon na makapanood ang mga fans sa pamamagitan ng telebisyon at ilang digital platforms sa mahigit 150 bansa sa mundo.

“In light of the coronavirus situation in Singapore, I have made the decision to convert ONE: King of the Jungle on February 28 into a closed event for broadcast only. The Singapore Indoor Stadium will not be open to the general public, but the event will proceed behind closed doors as scheduled live on all TV and digital platforms across 150+ countries around the world,” ani Sityodtong.

Inabisuhan din ang mga fans na maaaring i-refund ang mga tiket sa Sportshub Tix ang official ticketing partner ng ONE Cham-pionship sa Singapore.

Gayunpaman, inaasahang magiging mainit pa rin ang bakbakan tampok ang main event kung saan ipagtatanggol ni ONE World Champion Stamp Fairtex ng Thailand ang kanyang ONE Atomweight Kickboxing World Title kontra kay Janet Todd ng Amerika.