‘Di matanggap ni LeBron

Pagkawala ni Kobe Bryant

LOS ANGELES – Sa isang social media post ay ipinarating ni Lakers superstar LeBron James ang kanyang pagkabigla at kalungkutan sa nangyari kay Kobe Bryant at sa kanyang anak na si Gianna sa isang helicopter crash kamakalawa.

Bagama’t hindi pa handa ay pinilit ni James na ipahayag ang kanyang nararamdaman.

Nalaman ng tropa ng Lakers ang nangyari kay Bryant habang papauwi sa Los Angeles mula sa isang East Coast road trip.

“I’m not ready but here I go,” sabi ni James sa kanyang social media post. “Man I’m sitting here trying to write something for this post but everytime I try I begin to cry again just thinking about you.”

Sinasabing si James ang pinakahuling nakausap ni Bryant bago ang nasabing aksidente.

“I literally just heard your voice Sunday morning before I left Philly to head back to LA. Didn’t think for one bit in a million years that would be the last conversation we’d have,” ani James.

Nalampasan ni James si Bryant para sa No. 3 seat sa NBA career scoring list kung saan kaagad siyang binati ng tinaguriang ‘Black Mamba’.

“Until we meet again my brother!!,” ani James na nagdagdag ng mga hashtags na #Mamba4Life and #Gigi4Life.

Bilang paggalang at pakikiramay sa pamilya ni Bryant ay ipinagpaliban ng NBA ang laro ng Lakers kontra sa Clippers sa Martes (US time).

Inihayag ito ng liga isang araw matapos ang pagkamatay ni Bryant at ng kanyang 13-anyos na anak na si Gianna sa isang helocopter crash kasama ang pitong iba pa. “It was made out of respect for the Lakers organization,” sabi ng NBA.