DENVER – Kung siya lamang ang masusunod ay gagawin ni star rookie Zion Williamson ang kanyang debut para sa New Orleans Pelicans.
Ito ang sinabi ng No. 1 pick ng 2019 NBA draft bago ang 112-100 pagligpit ng Pelicans sa Nuggets.
Kasalukuyang nagrerekober si Williamson sa kanyang surgery para ayusin ang torn meniscus sa kanan niyang tuhod.
Sinabi ng 19-anyos na power forward na tinuturuan siya ng Pelicans kung paano maglakad at tumakbo sa magkaibang paraan.
Sa nakaraang linggo ay sumabak si Williamson sa individual shooting drills at group drills, ngunit hindi pa pinapasali sa 5-on-5 o maski sa 3-on-3 drills.
Sinabi ni New Orleans executive vice president of basketball operations David Griffin na kailangan ni Williamson na makapasa sa preseason conditioning tests bago siya payagang gawin ang kanyang debut.
Nagposte si Williamson ng mga averages na 23.3 points at 6.5 rebounds sa apat na preseason games para sa Pelicans.
Hindi siya nakita sa final game bunga ng knee soreness kasunod ang pagsailalim sa surgery noong Oktubre 21 isang araw bago buksan ang regular season.