MANILA, Philippines – Hindi inaasahan ng NorthPort na mabilis na makakalayo ang karibal na Barangay Ginebra.
Mula sa dikitang first quarter ay rumatsada ang Gin Kings sa second period at hindi na nilingon pa ang Batang Pier para sa 132-105 panalo sa Game Three ng kanilang semifinals duel sa 2019 PBA Governor’s Cup kahapon sa Smart Araneta Colisuem.
Dinuplika ng Ginebra ang nauna nilang 113-88 pananaig sa Game Two para itala ang 2-1 bentahe sa kanilang best-of-five semifinals series ng NorthPort.
Kumolekta si import Justin Brownlee ng 41 points, 11 rebounds, 7 assists, 3 steals at 3 blocks.
Nagdagdag si Japeth Aguilar ng 18 markers at 10 boards.
Lumakas din ang pag-asa ng tropa ni coach Tim Cone na pumasok sa kanilang ika-26 PBA Finals stint target ang pang-12 korona.
Ang maliit na 36-31 bentahe sa pagtiklop ng first quarter ay pinalobo ng Gin Kings sa 64-48 mula sa dalawang free throws ni Brownlee sa huling 28.5 segundo nito.
Tuluyan nang nabaon ang Batang Pier sa 89-61 sa 3:46 minuto ng third quarter na lumaki sa 100-72 sa pagtatapos ng nasabing yugto.
Samantala, aminado si TNT Katropa point guard Jayson Castro na hindi sila nakaporma nang kaagad kumamada ang Meralco sa first quarter sa Game Two ng kanilang semifinals showdown kamakalawa.
“Siguro i-match lang namin ‘yung energy nila and then we have a big chance to win that game next game,” ani Castro.
Niresbakan ng Meralco ang TNT Katropa sa Game Two, 114-94, kung saan nalimitahan si Castro sa 7 points matapos humataw ng 17 markers sa kanilang 103-94 panalo sa Game One.
Naglista naman si two-time PBA Best Import Allen Durham ng triple-double mula sa kanyang tinapos na 44 points, 19 rebounds at 11 assists para sa Bolts.
Pag-aagawan ng TNT Katropa at Meralco ang mahalagang 2-1 abante sa kanilang best-of-five semifinals duel sa Game Three ngayong alas-7 ng gabi sa Big Dome.