21 golds hinakot ng Pinas sa Subic

MANILA, Philippines — May 21 ginto ang nasikwat ng Team Philippines sa mahirap na Subic cluster kung saan karamihan idinaos ang water sports ng katatapos lang na 30th Southeast Asian Games.

Malaking ambag ito sa 387 (149 na ginto, 118 na pilak at 120 na tanso) na overall tally ng Nationals upang maging hari uli ng Southeast Asia sa unang pagkakataon simula nang ganapin din dito ang biennial meet noong 2005.

Pinakamalaki ang na-ging ambag ng Filipino triathletes dito na winalis ang lahat ng events kabilang na ang pinaka-unang ginto ng SEA Games sa katauhan ni John Leerams “Rambo” Chicano na naghari sa men’s triathlon na ginanap sa Subic Bay Boardwalk kung saan idinaos din ang Duathlon, Modern Pentathlon at ang 10km open water swimming.

Sinundan agad siya ni Kim Mangrobang na nagreyna sa women’s division habang kalaunan ay nagtulong silang samahan sina Fernando Casares at Maria Claire Adorna para sa kampeonato ng mixed triathlon.

Panalo rin sa women’s duathlon si Monica Torres.

Solido rin ang kontribusyon ng sailing, rowing  at muay thai na nagposte ng tig-tatlong gintong medalya.

Wagi sina Joemar Gallaza at Jearome Calica sa waikru mai muay habang nanaig sa kanilang mga division sina Phillip Delar-mino at Ariel Lee Lampacan sa Subic Bay Exhibition and Convention Center kung saan idinaos din ang Pencak Silat, Table tennis.

Namayani rin sina Lester Tayong at Emerson Villena sa international 470 race habang panalo rin ang Philippine team sa mixed keelboat racing at men’s race para sa three-gold haul ng sailing sa Subic Bay Yatch Club.

Sa Rowing na ginanap sa Kamana Sanctuary, Triboa Bay, nanalo ng dalawang gold si Melca Jen Caballero sa single at double sculls kasama si Joanie Delcago at wagi rin si Edmar Tacuel.

Dalawa naman ang nauwi ng bagong sport na Modern Pentathlon nang manalo sa mixed beach-laser event sina Princess Arbilon at German Samuel gayundin si Michael Ver Anton Comaling na wagi sa beach triathle event.

Parehong two-gold tally ang naitala ng windsurfing team at sepak takraw team.

Tig-isa naman ang naibusal ng pencak silat team sa katauhan ni Edmar Tacuel sa seni tunggal male division gayundin ang men’s trap team sa shotgun shooting na binuo nina Eric Ang, Carlos Carag at Hagen Alexander Topacio.

May  15 silver me-dals din na ambak ang mga atletang sumabak sa Subic cluster kung saan idinaos din ang  Beach volleyball at beach handball sa Subic Bay Tennis court, Malaawan Park sa canoe/kayak, traditional boat race, dragon boat racing, sepak takraw sa Subic gymnacium at chess sa Travelers Hotel.