11-golds sa Philippine Athletics team

CAPAS, Tarlac, Philippines – Kabuuang 11 gintong medalya na tinampukan ng tatlong bagong record sa Southeast Asian Games.

Ito ang naging maningning na kampanya ng Philippine Amateur Track and Field Association sa athletics competition ng ika-30 edisyon ng biennial event dito sa New Clark City Athletics Stadium.

Ang mga atleta ng mga bagong SEA Games at Philippine marks ay sina Fil-American sprinter Kristina Knott, Pinoy at pole vaulters Ernest John Obiena at Natalie Rise Uy.

Itinakbo ni Knott ang gold medal sa women’s 200-meter dash sa kanyang bagong Philippine at SEA Games record na 23.01 segundo.

Nauna nang nagtayo ang University of Miami standout ng tiyempong 23.07 sa preliminaries para basagin ang eight-month record na 23.16 ni Zion Corrales-Nelson, nagbasura sa SEA Games record na 23.30 na itinayo ni Supavadee Kawpeag ng Thailand noong 2009.

Ang Fil-Canadian ni Corrales-Nelson ang tumabon sa 23.35 Philippine record ni legend Lydia De Vega noong 1986.

Matapos si Knott, ang 23-anyos namang si Obiena ang bumasag ng national at SEA Games mark matapos lumundag ng bagong 5.45m sa men’s pole vault.

Itinapon ni Obiena, nauna nang nakakuha ng tiket para sa 2020 Olympic Games sa Tokyo, Japan, ang dating 5.35m ni Porranot Purahong ng Thailand noong 2017 SEA Games sa Malaysia.

Kagaya ni Obiena, isang bagong SEA Games mark din ang itinayo ng 25-anyos na si Uy sa wo-men’s vole vault mula sa kanyang nilundag na 4.25m para ibasura ang 4.21m ni Sukanya Chomchuendee na naitala noong 2013 SEA Games sa Myanmar.

Nakasama ni Knott sina Eric Cary, Eloiza Luzon at Anfernee Lopena sa pagkopo sa ginto sa mixed 4x100m relay.

Muli namang naghari si Cray sa kanyang paboritong men’s 400m hurdles event.

Ang iba pang nagtakbo ng gold medal sa kanilang mga events ay sina Christine Hallasgo (women’s marathon), Clinton Bautista (men’s 110m hurdles), Aries Toledo  (men’s decathlon), Melvin Calano (men’s javelin throw, William Morrison III (men’s shot put) at Sarah Dequinan (women’s heptathlon).

Ang walong silver medals naman ay nagmula kina Knott (women’s 100m dash), Carter Lily (men’s 800m run, Mariano Masano (men’s 1500), William Morrison III (Men’s discus throw), Mark Harry Diones (men’s triple jump), Joida Gagnao (women’s 3000m steeplechase), Mary Joy Tabal (women’s marathon) at ang women’s 4x100 relay team nina Knott, Zion Nelson, Kayla Richardson at Kyla Ri-chardson.