MANILA, Philippines — Bagama’t nasa ilalim ng team standings ay ibinibigay pa rin ng Alaska ang lahat ng kanilang makakaya sa bawat laro.
Muli itong pinatunayan ng Aces matapos patumbahin ang Blackwater Elite, 101-91, sa 2019 PBA Governor’s Cup kahapon sa Smart Araneta Coliseum.
Nagtala si guard Jeron Teng ng 19 points, 8 rebounds at 3 assists para sa ikalawang panalo ng Alaska sa walong laro at makatabla ang Blackwater at Phoenix.
“Despite our record, they still came out and really gave their best and slowly looking like the team we are kinda expecting,” ani coach Jeffrey Cariaso sa kanyang Aces.
Nagdagdag sina import Franko House at Abu Tratter ng tig-18 markers kasunod ang 12 points ni Vic Manuel.
Binanderahan naman ni import Marqus Blakely ang Elite mula sa kanyang 19 points, 7 boards at 7 assists, habang may 18 at tig-14 markers sina Niño Canaleta, Mac Belo at No. 2 overall pick Bobby Ray Parks, Jr., ayon sa pagkakasunod.
Isinara ng Alaska ang first quarter bitbit ang 29-19 abante hanggang palobohin ito sa 60-36, sa halftime.
Mula sa 58-73 pagkakaiwan ay nakabangon naman ang Blackwater, nahulog sa kanilang ikatlong dikit na kamalasan, at nailapit ang laro sa 73-78 tampok ang three-point play, fastbreak basket at triple ni Belo sa huling 1:27 minuto ng third period.
Ngunit bumirada sina Teng, Jake Pascual at Kevin Racal para muling itaas ang Aces sa 95-79 sa huling 5:23 minuto ng final canto.
Hindi na nakabawi ang Elite.