MANILA, Philippines — Bagong kampeon ang kokoronahan ngayon sa pagitan ng Spain at Argentina sa finals ng 2019 FIBA World Cup sa Wukeson Sports Arena sa Beijing, China.
Nakatakda ang harapan sa alas-8 ng gabi kung saan parehong tatangkain ng dalawang koponan ang matagal na nilang pagkagutom sa Naismith Trophy.
Huling nagkampeon ang Spain noon pang 2006 sa world championship kung saan huli rin silang nakapasok sa Finals.
Ang Argetina ay noon pang 1950 bilang kauna-unahang hari ng World Cup kaya’t siguradong gigil na mabawi ang korona 69 taon na ang nakalilipas.
Nakapasok ang Argentina sa finals noong 2002 subalit kinapos kontra sa Yugoslavia.
Inaasahang tatrangko sa atake ng Spain ang 1-2 punch combo nina NBA players Marc Gasol at Ricky Rubio na siyang bumida sa kanilang 95-88 double overtime win kontra sa Australia kamakalawa ng gabi sa semifinals.
Humakot ng 33 points at 6 rebounds si Gasol, habang may 19 markers at 12 assists si Rubio na aasa ng suporta mula kina Rudy Fernandez, Willy at Juancho Hernangomez.
Samantala, hindi pa rin inaasahang magiging ganoon kadali ang misyon ng Spain lalo’t determinadong Argentina ang kanilang makakaharap na siyang unang koponan sa World Cup na nakaaabot sa Finals nang wala man lang maski isang current NBA player.
Matapos silatin ang paboritong Serbia sa quarterfinals ay dinaig naman ng Argentina ang France, 80-66, na matatandaang tumalo sa bigating USA sa quarterfinals din.
Nanguna si dating Houston Rockets center Luis Scola na nagtala ng 28 points at 13 rebounds kahit pa 39-anyos na at retirado na sa NBA.
Aalalay sa kanya sina Gabriel Deck at Facundo Campazzo na may 13 at 12 markers, ayon sa pagkakasunod, sa pambihirang panalo ng Spain.
Samantala, mag-aagawan para sa bronze medal ang France at Australia sa alas-4 ng hapon.