MANILA, Philippines — Bagama’t isa nang batikang mambabatas ay inamin ni Sen. Manny Pacquiao na hindi natatapos ang kanyang pag-aaral.
Sa kanyang Twitter account noong Biyernes ay ibinahagi ng 40-anyos na si Pacquiao ang larawan ng kanyang ID.
Nag-enrol si Pacquiao sa University of Makati para sa kursong Political Science at Local Government Administration.
Walang dudang gusto ng Filipino world eight-division champion na lalo pang matuto sa kanyang trabaho bilang Senador.
Nagbigay naman ng kanilang mga papuri sa social media ang mga fans ni Pacquiao.
Sa kanyang pagiging Kongresista ng Sarangani ay nag-enrol si Pacquiao sa Certificate Course in Development, Legislation and Governance sa Development Academy of the Philippines-Graduate School of Public and Development Management (DAP-GSPDM).
Nagtapos si Pacquiao ng elementary sa Saavedra Saway Elementary School sa General Santos City, ngunit hindi na naipagpatuloy ang high school dahil sa kanilang kahirapan.
Nakapasa siya sa isang high school equivalency exam noong Pebrero ng 2007 para makapasok sa kolehiyo.
Binigyan si Pacquiao ng high school diploma ng Department of Education at kumuha ng college degree sa Business Management sa Notre Dame of Dadiangas University (NDDU) sa General Santos City.
Nagmula si Pacquiao sa panalo laban kay American Keith Thurman noong Hulyo para maagaw ang World Boxing Association welterweight crown ng huli.