14 teams sa PBA D-League
MANILA, Philippines – Kumpleto na ang 14 teams na magpapangbuno sa nalalapit na pagbubukas ng 2019 PBA Developmental League Foundation Cup sa Hulyo 25 sa Paco Arena sa Maynila.
Babandera sa Group A ang CEU na paborito sa second conference matapos mag-runner up sa kampeon na Cignal-Ateneo sa katatapos lang na first conference noong nakaraang buwan.
Makakasama ng Scorpions sa Group A ang mga batikang D-League squads na AMA Online Education at Marinerang Pilipino gayundin ang mga baguhang Asia’s Lashes, iWalk, Hazchem Inc., at NailTalk-St. Dominic Savio.
Mangunguna naman sa Group B ang mga nagbabalik na koponan na Technological Institute of the Philippines, McDavid – De La Salle Araneta at BST Basilan-St. Clare na nagtapos sa semifinals sa first conference.
Sasamahan sila ng iba pang bagitong koponan na Alberei Kings, Hyperwash Vipers, Italianos Shoes at Black Mamba Energy Drink.
Maglalaban-laban ang mga koponan sa single round robin format sa kani-kanilang grupo kung saan ang top four teams ay aabante sa quarterfinals.
Hahawak ng ‘twice-to-beat’ incentives sa QF ang top 2 teams ng kada grupo kontra sa bottom squads para sa tsansang makapanhik agad sa best-of-three semifinals.
Magsasagupa naman sa best-of-three Finals ang dalawang koponang matitirang nakatayo para sa titulo ng prestihiyosong developmental league sa bansa.
- Latest