Raptors lumapit sa finals

MILWAUKEE — May nararamdamang sakit sa kanyang mga binti si star forward Kawhi Leonard.

Ngunit hindi ito ipinakita ni Leonard sa kanyang iniskor na 35 points para muling pangunahan ang Toronto Raptors sa 105-99 paggiba sa Bucks sa Game Five at angkinin ang 3-2 lead sa Eastern Conference Finals.

“I’m not afraid of the moment,” sabi ni Leo-nard. “This is what I work out for in the summer. I’m just trying to win. It’s a matter of me being aggressive and don’t shy away from anything.”

Ito ang ikaapat na pagkakataon na umiskor si Leonard ng 30-point game para sa Toronto sa kanilang best-of-seven series ng Milwaukee.

Nagsalpak siya ng limang three-pointers at nagtala ng 7 rebounds at 9 assists.

“I can only say that he’s been really good. He gets stronger as the fourth wears on. He wants the ball and he wants to make the plays and he seems to be making the right plays,” ani coach Nick Nurse kay Leonard. “You’re almost shocked when he pulls up at 15 feet and it doesn’t go in. He’s playing at both ends.”

Tumipa naman si Fred VanVleet ng 21 points, tampok dito ang pitong triples habang may 17 markers si Kyle Lowry para sa paglapit ng Raptors sa NBA Finals sa unang pagkakataon.

Ang panalo kontra sa Bucks sa Game Six sa Sabado ang magtatakda sa kanilang title showdown ng two-time defending champion Golden State Warriors.

Bumangon ang Toronto mula sa 14-point deficit bago nakakuha ng15 points kay Leonard sa fourth quarter para ipalasap sa Milwaukee ang una nitong three-game losing skid sa season.

Tumapos si Giannis Antetokounmpo na may 24 points para sa Bucks, habang may 20 at 18 markers sina Eric Bledsoe at Malcolm Brogdon, ayon sa pagkakasunod.

Ang foul ni Brook Lopez ang nagdala kay Raptors center Marc Gasol sa foul line para sa kanilang 100-97 abante kasunod ang dunk ni Pascal Siakam para ipadyak ang kalamangan nila sa 102-97.