Thunder wagi sa Raptors

TORONTO — Kumamada si Paul George ng 28 points habang nagtala si Russell Westbrook ng triple-double sa kanyang 18 points, 13 assists at 12 rebounds para banderahan ang Oklahoma City Thunder sa 116-109 paggupo sa Raptors.

Nagdagdag si Dennis Schroder ng 26 points kasunod ang 19 markers ni Jerami Grant para tapusin ng Oklahoma City ang kanilang four-game losing skid at bumawi sa 123-114 home defeat sa Toronto.

Nagsalpak ang Thunder ng 20-of-43 shooting sa 3-point range.

Pinamunuan ni Kawhi Leonard ang Raptors, nag-laro na wala uli si guard Kyle Lowry sa ikalawang sunod na pagkakataon, mula sa kanyang 37 points, samantalang may 25 markers si Pascal Siakam.

Si Lowry ay may sprained right ankle.

Nagtala ang Toronto ng 13-point lead sa 5:23 minuto ng third period bago maagaw ng Oklahoma City ang kalamangan sa 80-79 mula sa layup ni Westbrook sa huling 1:18 minuto nito.

Ang magkahiwalay na tres ni George at fast-break layup ni Grant ang naglayo sa Thunder kontra sa Raptors sa 101-91 sa 6:21 minuto ng fourth quarter.

Sa Orlando, umiskor si Terrence Ross ng 31 points at nag-ambag si Evan Fournier ng 27 markers kasama ang game-clinching free throws para akayin ang Magic sa 123-119 overtime win laban sa Memphis Grizzlies.

Naglista si Nikola Vu-cevic ng 25 points para sa Orlando na nakabangon mula sa 14-point deficit sa fourth quarter para makapuwersa ng extra period patungo sa kanilang ikaapat na sunod na ratsada.

Nakahugot naman ang Memphis ng 29 points kay Tyler Dorsey habang kumolekta si Jonas Valanciunas ng 23 points at 24 rebounds.

Sa New York, nagsampay si Nikola Jokic ng 21 points at 17 rebounds at nag-ambag si Jamal Murray ng 18 points para sa 111-93 pananaig ng Denver Nuggets kontra sa Knicks.

Ito ang ikaanim na dikit na pananalasa ng Denver, nakahugot kay Gary Harris ng 14 points, para tumabla sa defending champion Golden State Warriors sa first place sa Western Conference.