MANILA, Philippines – Wala pang pormal na line-up para sa magaganap na 2019 Philracom “3-Year-Old Local Fillies & Colts” na ilalarga sa San Lazaro Leisure Park sa Carmona, Cavite sa darating na Linggo.
Subalit 12 tigasing kabayo ang nominado para sa nasabing stakes race.
May P1-M guaranteed na ikakalat sa first hanggang fourth sa event na inesponsoran ng Philippine Racing Commission.
Nagdeklara ng pagsali sa 1,500 meter race ay sina Fever Act, Gil’s Magic, Lakan Takhan, My Jopay, Real Gold, Royal Bell, Serafina, Snap Dance, Toy For The Bigboy, Turns Gold, Two Timer at Westeros.
Kuwento ng beteranong karerista, kahit sino ay puwedeng manalo dahil sa laki ng premyong nakalaan.
“Malaki ang premyo kaya pihadong lahat naghanda para makuha ang premyo,” saad ni Romeo Ladiana isang beteranong karerista.
Tatanggap ng P500,000 ang unang kabayong tatawid ng meta, P225,000 ang hahamigin ng segundo habang ibubulsa ng third at fourth placers ang halagang P125,000 at P20,000 ayon sa pagkakasunod.
Mag-uuwi rin ng P30,000 ang breeder ng winning horse.