3x3 President’s Cup didribol ngayon
MANILA, Philippines – Sisiklab ngayong araw ang kauna-unahang nationwide 3x3 league na Chooks-to-Go Pilipinas 3x3 President’s Cup sa SM Megamall Event Center sa Mandaluyong City.
Kabuuang 12 city-based squads ang sasalang sa unang leg ng makasaysayang torneo na inorganisa ng Samahang Basketbol ng Pilipinas para sa misyong makapagpasok ng koponan sa 2020 Tokyo Olympics kung saan ipapakilala ang 3x3 sport bilang medal event sa unang pagkakataon.
Babanderahan ang liga ng mga koponan ng San Juan-Go For Gold Knights, Valenzuela Classic at Zamboanga Valientes na nasa Group A gayundin ang pre-season champion Pasig-Grindhouse Kings, Marikina Shoemasters at Bulacan Kuyas sa Group B.
Hindi naman padadaig ang Group C teams na Cebu-Max4 Birada, Vigan Wolves at Pasay Voyagers, habang nasa Group D ang Bataan Risers, Bacoor Strikers at Quezon City-Zark’s Jawbreakers.
Magsisimula ang mga laban sa alas-11 ng umaga bago ang seremonyang pangungunahan nina FIBA officials Davic Crocker at Fei Gao kasama sina Ateneo mentor Tab Baldwin, Ronald Mascariñas ng Chooks-to-Go at Chot Reyes ng ESPN 5.
Magkakaroon din ng three-point shootout sa first leg na gigiyahan ng dating PBA player at ngayon ay Cebu-Max4 Birada manager Dondon Hontiveros, habang tatrangkuhan nina dating FIBA 3x3 king Kobe Paras ng University of the Philippines, NCAA slam dunk ruler Yankie Haruna ng St. Benilde at NU stalwart Daniel Chatman ang slam dunk contest.
Tatanggap ng premyong P100, 000 ang mananalo sa one-day first leg ng torneo, may kabuuang six legs.
- Latest