PBA Press Corps Awards ngayon

MANILA, Philippines — Pararangalan ng PBA Press Corps ang mga na-ngibabaw sa nakaraang season sa pagdaraos ng silver anniversary celebration ng kanilang Annual Awards Night ngayon sa Novotel Manila sa Araneta Center.

Kabuuang 13 awards ang ipamimigay ng grupo ng print at online sportswriters na nagkokober ng PBA beat sa dalawang oras na event na handog ng Cignal TV at iho-host ng veteran broadcaster na si Sev Sarmenta kasama si Rizza Diaz.

Highlight ng presentation ang pagbibigay ng Virgilio ‘Baby’ Dalupan Coach of the Year trophy kay Magnolia Pambansang Manok mentor Chito Victolero, utak ng pagkakampeon ng Hotshots sa season-ending Governors’ Cup.

Tulad ng 43-gulang na si Victolero, paparangalan din si San Miguel Corporation (SMC) sports director Alfrancis Chua bilang Danny Floro Executive of the Year winner kasama ang buong PBA Board sa pangunguna ni chairman Ricky Vargas na gagawaran ng President’s Award. Si Vargas, ang kasalukuyan ding Philippine Olympic Committee (POC) president, ang guest speaker.

Sa unang pagkakataon sa loob ng 25-taong kasaysayan ng annual tradition na unang idinaos noong 1993 sa dating Dona Nena’s Restaurant – igagawad ng Press Corps ang Lifetime Achievement Award kay Alaska team owner Wilfred S. Uytengsu.

Ang iba pang award na ibibigay ay ang Mr. Quali-ty Minutes (Vic Manuel), Defensive Player of the Year (John Paul Erram), Game of the Season (Barangay Ginebra-Rain or Shine 3OT), Breakout Player of the Season (Chris Tiu), Scoring champion (Stanley Pringle) at Order of Merit (June Mar Fajardo, Paul Lee at Manuel).

Pararangalan din ang All-Interview Team (Yeng Guiao, Joe Devance, Chris Ross, Mike Digregorio, Christian Standhardinger at Tiu), All-Rookie Team (Jason Perkins, Jeron Teng, Paul Zamar, Robbie Herndon at Standhardinger) at PBA D-League Finals MVP na ngayon lang din unang ibibigay.

Kikilalanin din ng Press Corps na magdiriwang din ng kanilang ika-30th founding anniversary ang mga dating presidents at senior members.