MANILA, Philippines — Pararangalan ngayon ang pinakamamagaling na manlalaro ng nagdaang taon sa Leo Prieto Awards bago ang pagbubukas ng 44th PBA Season sa Philippine Arena sa Bocaue, Bulacan.
Ito ang unang pagkakataon sa 43 taon ng PBA na idaraos ang Leo Awards sa season-opener, taliwas sa tradisyon ng pagsasagawa nito tuwing Game Four ng Governors’ Cup Finals.
Nakatakda ang seremonya sa alas-4 ng hapon bago ang parada ng mga koponan at bakbakan ng Barangay Ginebra at TNT Katropa sa alas-6:30 ng gabi.
Pinakaaabangang parangal ang Most Valuable Player na pag-aagawan nina Stanley Pringle ng Northport at June Mar Fajardo ng San Miguel.
Bahagyang angat si Pringle sa karera bunsod ng naipon niyang 35.5 statistical points kontra sa 33.2 SPs ni Fajardo matapos ang tatlong komperensya.
Subalit may laban din si Fajardo lalo’t nakapagbulsa siya ng dalawang Best Player of the Conference awards sa Philippine Cup at Commissioner’s Cup bukod pa ang kampeonato at Finals MVP.
Hangad ni Pringle ang una niyang MVP, habang makasaysayang ika-limang MVP naman ang tangka ni Fajardo.
Sinuman ang magwagi ay sigurado namang pasok ang dalawa sa First Mythical Team ng PBA.
Samantala, sigurado na sa Rookie of the Year trophy si Jason Perkins ng Phoenix bunsod ng malaking bentahe kina Jeron Teng ng Alaska, Raymar Jose ng Blackwater at Robbie Herndon ng Magnolia.