Adamson idedepensa ang Cheerdance title

MANILA, Philippines – Matapos dominahin ang Asian championship, paborito ang nagdedepensang Adamson University Pep squad sa pagdaraos ng Season 81 UAAP Cheerdance Competition nga-yon sa Mall of Asia Arena sa Pasay City.

Bilang reigning champion, huling magtatanghal ang San Marcelino-based team sa 8-team competition alinsunod sa tradisyon ng UAAP.

Mauuna ang University of the East sa order of performance kasunod ang University of the Philippines Pep squad at University of Santo Tomas Salinggawi Dance Troupe.

Pang-apat na magpapakitang-gilas ang De La Salle University Animo squad at pang-lima ang National University. Pang-anim na magtatanghal ang Ateneo Blue Babble Battalion at susundan ng Far Eastern University Cheering squad.

Tiyak mas malakas pa ngayon ang tiwala ng Adamson Pep squad dahil sa kanilang tagumpay sa Asian Cheerleading Invitational Championship na ginanap sa Singapore noong Marso 31.

Nag-uwi ng tatlong gintong medalya at isang silver ang Adamson sa continental competition kung saan dinomina nila ang pom event, open group stunt coed premiere at open group stunts coed elite division.

Ang kanilang silver medal ay mula sa open coed premiere division.

Sa pangunguna ni coach Jeremy Lorenzo, nasungkit ng Adamson ang unang titulo sa UAAP cheerdance contest noong nakaraang taon matapos mag-third place noong 2016.